Jer 33 | NdeIBE | STEP | UJeremiya elokhu esavalelwe egumeni labalindi, ilizwi likaJehova lafika kuye ngokwesibili lisithi:

Jeremiah 33

Isithembiso Sokubuyiswa

1 UJeremiya elokhu esavalelwe egumeni labalindi, ilizwi likaJehova lafika kuye ngokwesibili lisithi: 2 “UJehova, yena owadala umhlaba, uJehova owawenzayo wawumisa – uJehova yilo ibizo lakhe, uthi, 3 ‘Ngibiza ngizakusabela, ngikutshele izinto ezinkulu ezifihlakeleyo ongazaziyo.’ 4 Ngoba lokhu yikho okutshiwo nguJehova, uNkulunkulu ka-Israyeli mayelana lezindlu ezikulelidolobho langezindlu zobukhosi koJuda ezadilizwayo ukuba zisetshenziswe ekumelaneni lamadundulu okuvimbezela kanye lenkemba 5 ekulweni lamaKhaledi; ‘Zizagcwala izidumbu zabantu abafileyo engizababulala ekuthukutheleni kwami langolaka lwami. Idolobho leli ngizalifihlela ubuso bami ngenxa yobubi balo bonke.

6 “ ‘Kodwa, ngizaletha ukuphila lokusiliswa kulo: Abantu bami ngizabasilisa ngibenze bajabulele ukuthula okukhulu kanye lokuvikeleka. 7 Ngizabuyisa uJuda lo-Israyeli besuka ekuthunjweni njalo ngizabakha futhi njengalokhu ababe yikho kuqala.

8 Ngizabahlambulula kuzo zonke izono abazenza kimi njalo ngizabathethelela zonke izono zabo zokungihlamukela. 9 Ngakho idolobho leli lizangilethela indumela ukuthokoza, lokubongwa kanye lodumo phambi kwezizwe zonke emhlabeni ezizwa ngezinto zonke ezinhle engizenzela lona; njalo zizakwesaba ziqhaqhazele ngenxa yokuphumelela okukhulu lokuthula engizakuletha kulo.’

10 “UJehova uthi: ‘Liyatsho ngendawo le lithi, “Ilugwadule oluphundlekileyo, olungelabantu kumbe izinyamazana.” Kodwa emadolobheni akoJuda lasemigwaqweni yaseJerusalema okwatshiywayo, okungekho muntu kumbe inyamazana ehlala khona, kuzazwakala khona futhi 11 imisindo yokuthokoza lokuthaba, amazwi omlobokazi lomyeni, lamazwi alabo abaletha iminikelo yokubonga endlini kaJehova besithi, “Bongani uJehova uSomandla, ngoba uJehova ulungile; uthando lwakhe lumi kuze kube nini lanini.” Ngoba inotho yelizwe ngizayibuyisela njengoba yayinjalo kuqala, kutsho uJehova.

12 “UJehova uSomandla uthi, ‘Kuyo yonale indawo ephundlekileyo, engelabantu kumbe izinyamazana – kuwo wonke amadolobho ayo kuzakuba lamadlelo futhi ukuba abelusi baphumuze imihlambi yabo. 13 Emadolobheni elizwe lamaqaqa, lawemawatheni entshonalanga kanye lawaseNegebi, elizweni lakoBhenjamini, emizini eseduze leJerusalema lasemadolobheni akoJuda, imihlambi izadlula ngaphansi kwesandla salowo oyibalayo,’ kutsho uJehova.

14 “ ‘Izinsuku ziyeza,’ kutsho uJehova, ‘lapho engizagcwalisa isithembiso somusa engasenza endlini ka-Israyeli lasendlini kaJuda.

15 “ ‘Ngalezozinsuku langalesosikhathi ngizahlumisa uGatsha olulungileyo kunzalo kaDavida; uzakwenza okulungileyo lokufaneleyo elizweni.

16 Ngalezozinsuku uJuda uzasindiswa leJerusalema ihlale ngokuvikeleka. Ibizo ezabizwa ngalo yileli elithi; UJehova oyikuLunga Kwethu.’

17 Ngoba uJehova uthi, ‘UDavida kayikuswela umuntu ozahlala esihlalweni sobukhosi bendlu ka-Israyeli, 18 labaphristi, abangabaLevi, kabayikuswela umuntu oma phambi kwami kokuphela ukuba anikele iminikelo yokutshiswa, atshise iminikelo yamabele lokwethula imihlatshelo.’ ”

19 Ilizwi likaJehova lafika kuJeremiya lisithi:

20 “Nanku okutshiwo nguJehova, ‘Nxa lingephula isivumelwano sami lemini lesivumelwano sami lobusuku, ukuze imini lobusuku kungabe kusaqalisa ngezikhathi zakho ezamiswayo, 21 lapho-ke isivumelwano sami loDavida inceku yami – lesivumelwano sami labaLevi abangabaphristi abakhonzayo phambi kwami – singephulwa njalo uDavida angeke abe lenzalo ezabusa esihlalweni sakhe sobukhosi. 22 Ngizakwenza inzalo kaDavida inceku yami labaLevi abakhonzayo phambi kwami ingabi lakubalwa njengezinkanyezi zasemkhathini njalo ingalinganiseki njengetshebetshebe lasekhunjini lolwandle.’ ”

23 Ilizwi likaJehova lafika kuJeremiya lisithi;

24 “Kawukananzeleli na ukuthi abantu laba bathi, ‘UJehova useyilahlile imibuso emibili ayeyikhethile’? Ngakho bayabeyisa abantu bami njalo kabasabanaki njengesizwe.

25 UJehova uthi, ‘Uma ngingamisanga isivumelwano sami lelanga lobusuku kanye lemithetho eqinileyo yasezulwini lasemhlabeni,

26 lapho-ke ngizayilahla inzalo kaJakhobe lekaDavida inceku yami njalo ngingakhethi enye yamadodana akhe ukuba ibuse inzalo ka-Abhrahama, leka-Isaka lekaJakhobe. Ngoba ngizabuyisela inhlanhla yabo ngibe lesihawu kubo.’ ”